SuplemenSuplemen PJJ Tgl 04- 10 Juni 2017, Ogen : Perngandungen 3: 22-24

Renungan

Nats :
Perngandungen 3 : 22-24
Thema :
                      KELENG ATE TUHAN LA ERKERI-KERIN                                         
Kitab perngandungen eme kitab simelala erisiken puisi-puisi ceda ate erkiteken keruntuhen Jerusalem ras pembuangan. Aminna kitab-kitab e buen isina kerna ceda ate, tapi isuratken ka nge ije kiniteken man Dibata dingen pengarapen kerna wari-wari sipepagi. Puisi-puisi enda ipake kalak Jahudi ibas kebaktin pesta tahunen erpuasa ceda ate kerna kiniseran bangsa tahun 586 ope denga Kristus.
Ibas Pasal 3 : 1-66, I turiken penggejaben kerna perbeben siderpa kegeluhen bangsa Israel, bagi ukumen tempa iakapna bana kerna kiniseran-kiniseran sireh e, teridah arah penggejaben :
1.  Keadaan simberat tuhu-tuhu( 1-7 )
IgeraNa aku kugelapen…, iulih-ulihina rusur gudam aku…daging ras kulingku ipelepasNa kesip.., ierukNa aku bas penjara…, ipaksana aku nggeluh bas kegelapen kematen…, iketNa aku alu rante.
Kiniseran e ngkeleweti geluh bangsa Israel, tuhu-tuhu seh beratna… istilah peribahasa “ Sudah jatuh tertimpa tangga, dikejar anjing pula “. Perbeben e negu-negu kempak kekoten ras keputusaasaan, lanai tempa lit sierlayas nari bas geluhna.
 
2.  Ibas perbeben simberat bas pusuh tergejab tempa-tempa Tuhan la erdiate ras la nampati
( 8-13 ). Serko mindo penampat, tapi la diate Dibata megiken aku…, ling-ling batu ngolang-ngolangi kujapa pe aku nulih…, ipegestengNa anak panahNa janah aku ibahanNa jadi sasarenNa..ipanahkenNa anak panahNa kempak pusuhku.
 
Ungkapen enda ncidahken perbeben si reh man bangsa enda tempa iaturken Tuhan, harus jadi ngkenai bangsaNa, la lit dalan nilah. Perbeben e tempa iatanken/ijinken Tuhan jadi.
 
3.  Bas perbeben teman pe la jadi teman ( 14-20 )
Kepeken ibas perbeben sipertemani bangsa e pe lalit. Justru sinawa-nawai melala gedang-gedang wari, sipesega-sega ras sindedeh nge melala. Teman seharusna jadi penampat bas susah tapi sebaliklah teman pe la jadi teman. Emaka kai siperluken bangsa e kebutuhen utamana pe labo lit simperdiatekenca emaka nina penulis puisi enda nina : nggo lupa aku uga aku mejuah-juah, uga dame, uga malem ate. Inganku tading pe lanai lit, getem kel ukurku.
 
4.  Amin pe mberat perbeben peturahlah tetap pengarapen man Tuhan ( 22-24 bahan PJJ- nta )
 
-     Lenga bo keri keleng ate Tuhan, perkuah ateNa tetap nge lit. Keleng ate Tuhan e mbincar tep-tep erpagi-pagi, bali tetapna ras matawari si pultak arah Timur.
Kai pe sijadi bas kegeluhen, gia seh beratna perbeben tapi peturahlah pengarapen maka keleng ate Tuhan lenga bo keri. Adi mbincar denga matawari tep-tep erpagi-pagi berarti ibere Tuhan denga kita ngidah wari simbaru. Wari simbaru sialoken erkiteken ibere Tuhan denga kita nggeluh. Adi nggeluh denga kita berarti ipelihara Tuhan denga nge kita. Emaka ula mbiar ras ula aru ateta( Band. Matius 6: 25 )
 
-    Tuhan kap baginku emaka man baNa ngenca aku erpengarapen ( ibas bhs Indonesia : “ Tuhan adalah bagianku” kata jiwaku, oleh sebab itu aku berharap padaNya ). Penulis mengakui bahwa Tuhan adalah bagianku…berarti bersamaku, ada denganku dan di dalam aku. Erkiteken Tuhan ras kalak si lit bas perbeben emaka kalak singenanami perbeben la sekalak ngalakennca tapi ras Tuhan ngalakenca . Adi Tuhan ras kita emaka ngasup kita ngalaken kerina keadaan erkiteken kuasa siibereken Kristus man banta ( Band.Pilipi 4:13 ).
 
5.  Perbeben ras kiniseran melala derpa kegeluhen manusia. Banci jadi erkiteken bencana alam, ekonomi lemah, anak-anak sigutul, keluarga si la dame, sakit, ras sidebanna. Erpengarapenlah rusur maka bas susah, si gejab maka keleng ate Tuhan langa bo keri. Sebagai contoh : lit iderpa pinakit, mesui iakapTuhu latih ndalanisa, tapi peturahlah rusur pengarapen maka banci malem sebab ibas Tuhan, la lit si metahat. Adi kune pe la malem nehenlah uga Tuhan tetap erkeleng ate pengasup kita erdame ras pinakitta. Iinget sisakit e keleng ate Tuhan lit lalap arah kai sibanci sigejabkenna, umpamana la pernah tulpak biaya ertambar, lit rusur kade-kade si nungkuni kesehatannta, gereja pe rusur notoken ras ndahi ia. Mari sisaksiken maka keleng ate Tuhan langa bo keri, lit lalap seh rasa lalap. Amin
 
Pdt. Karvintaria br Ginting, STh
GBKP Rg. Klender-Klasis Jakarta Kalimantan
HP : 08126359640
 

Suplemen PJJ Tanggal 07-13 Mei 2017, Ogen Perbahanen Rasul 11:1-30

Renungan

“Gereja sikutandai”
(Perb.Rasul 11 : 19 -30 )
 
 
1. Sejarah perdalinen berita simeriah, sada hal simeresa ngantusisa sabab pada umumna Gereja bertumbuh labo arah keadan simenyenangkan, labo tupung kita nggeluh ibas zona nyaman, kerina bagi ukur, lalit tantangen subuk ibas nari bagepe idarat nari. Tapi Gereja bertumbuh ibas “tantangen”, ibas “penganiayaan”, ibas penderitaan.
Terjadina peniksaan man jemaat mula-mula i Jerusalem erbahanca kalak sitek lawes Penike, Kiperus ras Antiokia. Payo bagi “nebeng lau maler” adi lau itebeng maka lau e bakal ndarami ingan maler ku kawes tah ku kemuhen.
 
2. Ibas teks-ta enda ituriken arah dahin berita simeriah e ”enterem kalak sitek”(ay.21 ras ay.24. Perlu sigargari kuga perdalinen perpulungen enda, kai sinilakokenna?
 Tetap meritaken berita simeriah e (ay.20)
 Kiniersadan arih ibas nehken berita simeriah e (ay.22)
 Nggeluh ibas pengajaren (ay.26)
 Nanpati rikutken kengasupen(ay29)
 
3. Ichwei G.Indra ibas buku Pola Gereja PB, nuriken 5 Bentuk Pelayanen, guna mabai kalak tek man Yesus eme:
 Pelayanan MATA
Ngidah /meteh kecibal teman /Saling memperhatika (Ibrani 10 : 24 . Dan marilah kita saling memperhatikan supaya kita saling mendorong dalam kasih dan dalam pekerjaan baik.)
 Pelayanan KATA
“Mereken dorongan, mereken semangat/Kata-kata yang membangun.(Kolose 4:6. Hendaklah kata-katamu senantiasa penuh kasih, jangan hambar, sehingga kamu tahu, bagaimana kamu harus memberi jawab kepada setiap orang.)
 Pelayanan TELINGA
Ngasup megiken teman, la minter reaktif (Jakobus 1:19. Hai saudara-saudara yang kukasihi, ingatlah hal ini: setiap orang hendaklah cepat untuk mendengar, tetapi lambat untuk berkata-kata, dan juga) lambat untuk marah
 Pelayanan TANGAN
Nampati teman, Sisampat-sampaten (Galatia 6:2. bertolong-tolonganlahmenanggungbebanmu! Demikianlahkamu memenuhihukumKristus.)
 Pelayanan KAKI
Ndahi/Berkunjung/PRT-Perkunjungen Rumah Tangga (Roma 1:10. Aku berdoa, semoga dengan kehendak Allah aku akhirnya beroleh kesempatan untuk mengunjungi kamu)

Pdt.Iswan Ginting Manik
HP.0812.7020.9020
 

Suplemen PJJ Tanggal 30 April -06 Mei 2017, Ogen Masmur 66:1-9

Renungan

Tema :  Enggo kuangka perbahanen Dibata arah sekelewetku
(Masmur 66 : 1 – 9 )
 
 
1. Perdalinen kegeluhen kalak sierkiniteken banci kataken unik, sabab salah sada hal sipenting ibas kegeluhen eme “ngataken bujur” man Dibata. Ngataken bujur labo saja tupung reh sibagi ukur tapi pe paksa reh sila bagi ukur.Alu kata sideban Kalak sierkiniteken arus ngataken bujur ibas sikugapana pe geluh enda.

Sekalak Perbapan ngataken Bujur ia erkiteken icopet kalak dompetna, Engakai??? Nina: Sisitikna lit 3 hal maka aku ngataken Bujur:
Sipemena : Rembang la melala isina dompetku si copet kalak e
Sipeduaken : Dompetku buatna, labo kesahku
Sipeteluken : Aku icopet labo aku sipencopet.
 
2. Pemasmur ibas bahan PJJ.nta sendah ngajuk kita guna ngataken bujur nginget perbahanen Dibata ibas sejarah kegeluhen bangsaNa.Mehantu kal perbahanenna; isalihkenNa lawit jadi taneh kerah......iperdiatekenNa bangsa-bangsa maka ola memberontak man baNa.(Ayat 5-7).
Sijadi penungkunen man banta ibas kita ndalani kegeluhenta, seh ija kita ngidah maka Dibata e tuhu-tuhu mehantu, Dibata e ngasup mereken serpang pulah man banta?
 
3. Pemasmur mpertegas ulang guna pemuliaken Dibata labanci lang lit “pengakun" kerna perbahanen ras kinibisan Dibata. Pengakun siperlu sisehken langsung man Dibata.Pengakun labo terjeng kata-kata saja tapi pengakun ibas pusuh sibersih nari.
Katakenlah man Dibata , nindu “andiko, mejin tuhu perbahanenNdu”
Adi kita ngakuken Tuhan, e berarti paksa sie kita enggo ngaloken kuasa Tuhan, kita ngendesken geluhta guna kemuliaan Tuhan, kita encidahken maka Dibata sangana erdahin/erkuasa ibas kegeluhenta.Ibas Amsal 3: 6 nina "Akuilah Dia dalam segala lakumu, maka Ia akan meluruskan jalanmu" .
 
4. Pengakun nandangi kinihantun Dibata , labo hanya guna pribadi nuduhken hubungen si akrab ras Tuhan tapi pe pengakun e seh kubas “pemberitan”/”kesaksian”. Marilah dingen nehenlah siibahan Dibata................(ay.5) O bangsa-bangsa Pujilah Dibata kami,berekenlah puji-pujinndu man baNa(ay.8)
Alu kata sideban Pengakunta nadangi kinibisan Dibata arus iterusken man kalak sideban.
 
5. “Enggo kuangka perbahanen Dibata arah sekelewetku” ertina arah kerina pengalamen kegeluhen, arah kai sijadi isekelewetta si idah Tuhan erdahin Dibata “campur tangan”, Dibata la pernah nadingken kita. Nina Pemasmur : Langit encidahken kemulian Dibata, awang-awang erberita kerna perbahanenNa.(Masmur 19:2). Bagepe Rasul Paulus ngataken "Sebab segala sesuatu adalah dari Dia dan oleh Dia dan kepada Dia: bagi Dialah kemuliaan sampai selama-lamanya " (Roma 11:36) dan kemuliaan Allah dinyatakan di dalam Yesus Kristus (Filipi 2:11).
 
Pdt. Iswan Ginting Manik
Runggun Pondok Gede
 

Suplemen PJJ tanggal 16-22 April 2017, Ogen I Korinti 15-53-58

Renungan

Nast :
I Korinti 15 : 53-58

Tema :
Ras Kristus kita menang.
 

1. Adi isingetken kata menang berarti lit sikalak, janah adi isingetken menang kalah berati lit pertandingen/ siman lawan emaka ibas pertandingen e lit si sikalah lit si menang. Janah kerina kalak bertanding pasti ersura-sura gelah menang tapi malabo kerina banci menang/pemenang. Emaka gelah banci ndatken kemenangen maka ope denga pertandingen harus latihen/melatih diri terus menerus, latih latampil latih, las latapil lasn udan la tampil udan, menurun, menanjak, lurus belok-belok harus kerina ihadapi guna ndatken kekuaten si luar biasa. Emaka adina lawanta e hebat banci si kalahken dingen kita me pemenangna ( enda duniawi).

Bageme kita sebagai kalak kristen (jemaat), maka kepeken seh asa gundari tetap kap kita ibas gelanggang pertandigen, musuhta eme kuasa jahat, doni enda dem alu berbage bage kejahaten sini ipengaruhi iblis, janah kita me musuhnasi atena italukenna. Kita harus siap sedia (mempersipken) ken dirinta gelah ula kita banci talukenna. (band I kor. 9 : 24-27).
Emaka silatih lah dirinta erpalasken kata Dibata, dingen tetap kita ras kristus Tuhanta.

2. Teksta enda ngingetken man banta eme peristiwa kekeken Tuhan Yesus ibas simate nari, ija kenca ikuburken ibas wari peteluken maka kek Ia, dingen italukena kuasa kematen (Markus 16 : 6). Emaka doni kematan italukenNa, Ia keke utuh bagi kuga nai ope denga ia mate i kayu persilang.
Emaka sada keriahen man banta sitek man Yesus, sebab ibas ia enggo naluken kematen, maka kita pe ikut menang radu ras Tuhan Yesus, emaka kai sibiak doni enggo banci sitaluken erpakasken biak sirehna idur Tuhanta nari eme si masap-masap enggo igantiken ku biak sila ermasap-masap si labanci mate (kegeluhen- situhu-tuhu) bagi Yesus keke maka kita pe keke pagi guna kulanta iubah alu simbaru (ayat 53-54).

Kematen enggo itelan kemenangen enggo reh, emaka kuasa kematen e enggo italuken, lanai erbisa/la ergegeh kuasana (Ayat 55). Kematen /dosa enggo italukenNa, kemenangen enggo iberekenNa man banta (Ayat 57). Man banta kepeken labo ngadi bertanding, tapi bertanding radu ras Kristus Tuhanta sipemenag e. Emaka kita labanci lengah harus berkeyakinan teguh, tutus ibas ndahiken dahin si enggo ipercayakenNa man banta kerina. Kai sidahiken kita la percuma, eme kemenagen (ayat 58).

3. Pertarungan dunia lanjut, tapi kita harus megegeh, eme kita harus radu ras Kristus sienggo menang e, Janah lanai lit kebiarenta guan ngalakenca. Emaka ibas dalani kegeluhen doni enda tetap setia ndalaken kataNa, dingen tetap erberita simeriah arah perbahanta, pengerana bagepe arah kai silit ibas kiita (melayani).
Sebab kita nggeluh la rikutken sura-sura doni enda, (manusia) tapi kita nggeluh rikutken sura-sura Dibata ( Band Roma 8 : 9).
Janah guna menghadapi kerina si nyata ibas geluh enda maka kita harus memperlengkapi dirinta alu senjata Rohani ( Band Epesus 6 : 10-20).
Bagi ende-endenta no . 360 ( Ibas Tuhan Aku megegeh).
Bagepe lit ende-enden anak KA-KR.
Bila iblis mengganggu tembak saja.
Katanya jangan maju-maju saja.
Yesus memberi kemengan, oleh darahNya Kudus.
Yesus Memberi kekuatan , kita menang.
 
Selamat ber PJJ
 
Pdt Andarias Brahmana.
 

Suplemen PJJ tanggal 09-15 April 2017, Ogen I Petrus 3:17-20

Renungan

Bahan :
I Petrus 3 : 17-20

Thema :
Nggeluh ibas pengarapen
 

1. Lit istilah : masa lalu penuh kenangan , masa kini perjuangan dan masa depan eme penuh pengeharapan. Janah kita gundari ngeeluh eme kita tetap berjuang, erdahin gelah ndatken hasil si luar biasa, janah lenga si eteh kai si terjadi arah perjuangen e, namun kerina kalak lit pengarapenna maka ia berhasil si luar biasa, gelah malemkel ate.
Gambaren enda me perdalanen geluhta sebagai kalak kristen, kita kerina nggeluh ibas kiniteken, tek man Tuhan Yesus, janah pengarapenta kai sini janjiken Yesus man banta banci min sidatken pagin. Emaka kita terus alu giat erdahin, erkiniteken gelah sukacita dunia juga sukacita Surga.
Ertina doni pe jadi milikta Surga pe pagi dat ka , tapi guna sienda kerina maka harus alu perjuangen, dan berjuag. Berjuang radu ras Kristus Tuhanta eme ija kita harus punya pengarapen, pengarapen sitetap eme tetap nggeluh ras Tuhan Yesus.

2. Nai nari (Mulai jaman Yesus seh asa gundari tetap si idah lit kiniseran –kiniseran si inanami. Yesus pe mualai ia ndahiken dahinNa, bagepe ia seh mate i kayu persilang, bagepe seh Yesus nangkih kusurga tetap ijumpanina kiniseran-kiniseran, bagepe murid-muridNa seh ngayak ndnadingken doni enda jumpa lalap kiniseran. Sehpe sebagian besar ajar-ajar mate ndatken peniksaas, si idah Paulus pe sebagai Rasul haruska mate isiksa ras ibunuh tapi aminna bagepe labo ersurutna kiniteken jemaat, sebab hal enda enggo iungkapken paulus man perpuluhen Pilili ( Pil 1 :12-14).
Kepeken kita enggo ituntut erbahan simehuli arah sikap hidup, sebab kalak kristen eme sira ras terang (matius 3 :13-16), emaka gelah banci jadi saksi sikugapanape harus ialakenna, la surut kinitekenna e, sebab eme perbahanen simehuli (sura sura Dibata).

Adi ndalaken sura-sura Dibata kita njumpai kiniseran tetap tabah, setia dingen ngalakenca alu dem kesabaren. Berarti adi kita ebahan si jahat menandaken Yesus e si sia-siaken ia mate ikayu salib, tapi adi kita tetap erbahan simehuli dingen ngalaken hal-hal silabagi ukur maka pengorbanen Kristus e erguna man banta. Arah pengorbanenNa maka kita erpengarapen nandangi wari-wari sireh e, arah kita tek ras ndalaken simehuli, maka ibabaina kita rembak ras Dibata (Ayat 17-18)
Ibas Jaman Nuh mela kalak megombang man Dibata arah Nuh, i ejek-ejek na kal Nuh si erbahan kapal idas uruk, tapi Dibata erkuah ate , emaka arah kematen bagepe penguburan Yesus lit kesempaten guna meritaken berita ibas Dibata nari man tendi-tendi si tertaban e, (ayat 19-20).

3. Dibata ndalaken kelengna e , gelah ula min manusia si jadikenNa e, gelah ula min ia bene ibas dosa, tapi gelah ngeluh erkiteken kuasaNa e, Dibata arah kematenna AnakNA/ ikubur pe ia nehken berita keselamaten. Emaka katawari saja pe ipakeNa waktu nehken berita simeriah e man kerina si enggo ndabuh kubas dosa, gelah bagi janji Yesus “ gelah ija Aku ije Kampe “ (Yoh 14 :3).
Emaka kalak si erpengarapen ibas kegeluhenna tetap ia berjuang guna keselamaten na , sebab kai siniarapken e bakal seh me pagi paksana si loken. Kemalemen ate e enggo jadi sikerajengnta seh rasa lalap, bahkan bas kegeluhenta gundari pe enggo banci sinanami keriahen e, apaika pagin ras Yesus ndai ( Band Masmur 37 : 25)

Pengarapen e lenga bo teridah tapi pasti lit dingen ijumnpia me pagi. Emaka tetaplah erdahin, ersaksi, melayani sungguh-sungguh. Kita berharap nandangi sipasti eme nggeluh ras Tuhanta Yesus Kristus.
Selamat ber PJJ
 
Pdt Andarias Brahmana.
 

Page 1 of 25

BP-KLASIS-XXX

"SELAMAT DATANG mengunjungi Web GBKP KLASIS JAKARTA-BANDUNG"

Renungan

  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15

Pengunjung Online

We have 223 guests online