Khotbah Kejadian 2:18, Pekan Keluarga Wari 1 tgl.02 Juni 2013

Renungan

Introitus : 
Jabu ipanteki erpalasken kepentaren ras pengertin. (Kuan-Kuanen 24:3) 
 
Ogen : Matius 19 : 1 – 6; Khotbah : Kejadian 2 : 18 
 
Tema : Dibata Sinetapken Jabundu 
 
Jabu entah pe keluarga ibas ilmu social eme kap lembaga/kelompok/bagian terkecil ibas masyarakat. Emaka arah jabu-jabu si lit ibas sada negara banci menentuken perkembangen bangsa e ntah pe kehancuren sada bangsa, khususna ibas menentuken moral ras integritas masyarakatna. Adi mehuli keadaan keluarga-keluarga, mahan bana mehuli ka keadaan masyarakat bage pe negara terlebih gereja. Ertina, keluarga/jabu she kal pentingna nandangi masyarakat ras gereja. Sebab arah keluarga-keluarga si mehuli banci terbentuk generasi-generasi penerus si berkualitas (moral & integritas).
 
Adi lembaga pemena si ibentuk Dibata man manusia eme keluarga siterbentuk arah sada perjabun/pernikahan. Ras lembaga e ibentuk Dibata ope denga manusia dabuh ibas dosa. Ertina perjabun e mehuli I hadapen Dibata. Maka erjabu ras membangun sada keluarga labo dosa. Bahken perjabun e merupaken persekutuan si istimewa ibas manusia ras Dibata. Senina ras turang kekelengen ibas Yesus Kristus… 
 
Adi isungkun kita si enggo erjabu entah pe berkeluarga, engkai maka kita erjabu? Pasti mbue alasenta merenda milih pasangenta, mungkin alasen-alasen e banci : 
  1. Ia mejile ntah pe ganteng, makana ngit aku erjabu man bana, pasti aku bahagia. 
  2. Ia mirip kal ras nandeku/bapangku s idem kesabaren, keleng ate adi mirip ia pasti ia pe bage. 
  3. Ia rajin, tutus atena erdahin, tutus ku gereja, bersih adi nyuci uis, rapi kal adi nyetrika baju, beluh ia erdakan. 
  4. Orang tuana kalak bayak, mbelang jumana, mbue mobilna,….rsd. 
 
Mbue hal si jadi pendorong sekalak jelma gelah ia erjabu. Ngena kal atena man ndehara ntah pe perbulangenna perban lit sada hal ibas pasangenna si banci ibanggakenna guna mengisi kekosongen ntah pe kekurangen si lit ibas ia. Tapi adi keadaan siniharapken e berubah ntah isadarina ternyata sifat pasangenna e bertolak belakang bagi sibayangkenna, maka banci timbul kekecewaan, frustasi, sehingga terjadi pertengkaren, la nai lit pengharapen dungna banci sirang jabu e. 
 
Ibas Kejadian 2: 18, ijelasken bahwa perban Inisiatif Dibata saja maka lit keluaraga ntah pe jabu. Dibata si nepa jabu e, emaka pasti lit tujuan ras sura-sura Dibata si mehuli nandangi tep-tep jabu. Si utama tujuan Dibata eme jabu e banci jadi alat/perpanjangen tan Dibata guna ngenepi Misi Dibata. Dibata meteh bahwasana la mehuli manusia nggeluh sisasa-sisada, emaka Dibata mereken penolong si sepadan man banta. 
 
Awalna Dibata mereken sada tanggung jawab si mbelin man manusia e (Adam), ngkuasai ras njagaisa (Kej. 2:15) kerina tinepa Dibata. Enda labo pendahin si mudah apaika harus idahiken sekalak saja, perban ngidah kondisi e ikataken Dibata ‘la mehuli’. Ibahan Dibata solusi nepa teman si sepadan ras Adam, sebab labo banci rubia-rubia, perik-perik banci jadi teman si sepadan man Adam. Manusia memerluken teman erbagi kerna beban pikiran, berkomunikasi si seri ras ia terlebih si sentudu ras tempas Dibata (Kej. 1:26) guna banci saling menghargai tinepa Dibata. Jadi mitra kerja Adam si sesuai bagi sura-sura Dibata. Menjadi persekutuan yang Kudus labo persekutuan ras rubia-rubia ntah pe perik-perik, aminna gia ibas jaman genduari enggo mbue jelma e riahen akapna erteman ras rubia-rubia ras perik-perik asangken man jelma sideban, makana enggo mbue genduari tingkah laku jelma e bagi rubia-rubia (licik bagi nipe, meganjang ukur bagi singa, merangap bagi babi, rsd). 
 
Perjabun manusia berbeda ras perjabun hewan/rubia-rubia, anem gia rubia-rubia/hewan e pe itepa Dibata erpasangen jantan ras betina, tapi manusia melebihi ibas akal budi, kesadaren akan diri sendiri, kesadaren ibas mbegiken sora Dibata guna banci membedaken apai si mehuli ras la mehuli. Walaupe perjabun manusia mencakup naluri ras nafsu bagi si lit pe ibas rubia-rubia/hewan, tapi perjabun manusia merupaken sada hal sindauh lebih agung asangken perjabun rubia-rubia/hewan, sebab manusia itepa sue ras tempas Dibata. 
 
Dibata nepa manusia dilaki ras diberu gelah jadi mahkota ciptaan Allah, labo lit perbedaan derajat. Adi lit denga pemahamen bahwa diberu lebih rendah asangken dilaki eme sada kesalahen si mbelin ihadapen Dibata. Adi enggo ikataken jabu ntah pe keluarga e terbentuk atas Inisiatif/keputusen Dibata, emaka ndehara ntah pe perbulangen si enggo ibereken Dibata she kal istimewana. Adi lit si atena ncedai perjabunna, la setia man pasangen si enggo ibereken Dibata man bana, maka ia musuh Dibata (bnd. Matius 19:6). Dibata la ngena nandangi jelma si atena ncedai jabuna si enggo irancang Dibata alu alasen kai pe. Sebab Ia sendiri si enggo netapken ras masu-masu jabu e, emaka ula ise pe si anggap enteng kerna arti perjabun. 
 
Pdt.Mulianta Enaria Br. Purba 
GBKP Graha Harapan

 

 "SELAMAT DATANG mengunjungi Web GBKP KLASIS JAKARTA-BANDUNG"

Renungan

  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15

Pengunjung Online

We have 115 guests online

Login Form