Khotbah Galatia 6:1-6, Pekan Penatalayanen wari IV, Rabu 23 Januari 2013

Renungan

Introitus :
Ise kin temannta manusia (Lukas. 10:29)

Ogen : Lukas 10:25-37 Khotbah : Galatia. 6:1-5

Thema :
Kesah Sibadia mpengasup ngawan perpulungen guna engkelengi teman manusia

(1) Senina ras turang arah nats renungenta sendah eme nehken kekelengen man temanta manusia. Ayat 1: O senina-seninangku adi lit sekalak siterdat ersalah (mis: korupsi, nangko, erlua-lua, rsd). Memang manusia labo lit si la ersalah, termasuk kita pe pernah erban salah, manusia la luput ibas kesalahen nari, kitik entah mbelin kesalahen silakoken e kerina idah Dibata amin gia manusia banci la ngidahsa. Uga sikapta nandangi kalak si erbahan salah enda?

Sada kenyataan ibas sada perpulungen: pernah lit sekalak anggota perpulungen enggo erbahan salah (erlua-lua), tapi kedungenna ia menyadari kesalahenna jenari mulihken ia reh ku gereja. Teridah respon arah perpulungen nari menjahui ia reh nina lalit siemperkuanisa seolah-olah ciga akap kalak sienterem ngidah ia. Mekatep sikap sibagenda rupana pe teridah bas kita kalak Kristen, lit sikap menghakima secara tidak langsung nandangi kalak sierbahan salah ndai. Tentu adi bage perbahanenta la payo, perbahan nina ara Galatia 6:1 : Kam sienggeluh ibas Kesah Sibadia negu si salah ndai alu manjar-manjar gelah mulihken kudalan simehuli. Negu alu dem keleng ate, mendekati, menemani ras nampati ia gelah banci igejapkenna kekelengenta, ije nari isadarina maka si I lakokenna e la payo janah mis ia robah, tadingkenna perbahanen si la mehuli e.

(2) Rikutken ayat 2, ibas kita sisampat-sampaten berarti kita enggo nehken undang-undang Kristus. E berarti kekelengen arus menjadi ciri khas kegeluhen kalak sitek. Kekelengen sini maksudken arah nats enda eme kekelengen Agape bagi keleng ate Kristus man perpulungenNa.

Memang bas doni enda lit rbage-bage kekelengen, antara lain keleng Eros: eme kekelengen si lit bas singuda-nguda ras anak perana. Kekelengen enda eriteken kebutuhan, contohna, erkiteken ia mejile, erkiteken ia ganteng, erkiteken ia jago, rsd. Ije lit arapen nandangi si ikelengina e. Lit ka kekelengen Filia: eme kekelengen erkiteken teman meriah, teman sekerja, rsd. Kekelengen enda icidahkenna gelah pagi pe ia banci ka I kelengi temanna e (mangkuk laus mangku ka reh). Tapi adi kekelengen Agape eme kekelengen sejati, erkiteken Dibata nggo leben engkelengi kita maka kita rutang ehken kekelengen/penampat. Lt sada keluarga adi bagi ukurna denga temanna e kata wari pe banci sampatina, tapi adi lanai bagi ukurna, e enggo ngadi penampat e.

Adi kekelengen sibagenda, keklengen doni denga e, lenga bo bagi siarapken Dibata. Arah bahan ogenta si pertama ndai: Kalak Samaria erkeleng ate man kalak si i rampok (kalak Yahudi) si memusuhi kalak Samaria. Aminna gia kalak Yahud menganggap kalak Samaria kafir tapi icidahkenna keklengenna alu nambari kalak sini kena ramok enda ndai seh malem.

Endam me themanta bas tahun 2013 enda: peningkaten solidaritas eksternal GBKP, kekelengen labo man temanta saja, kade-kadenta saja, teman sada perpulungen saja, tapi: diluar perpulungenta entah pe man kalak si la bagi ukurta. Kekelengen labo hanya terjengge ngerana saja ngenca tapi arus silakoken ibas geluha, ula bagi kalak lewi, imam situtus ertoto kurumah pertoton tapi la ia nggit nampati kalak siirampok bas dalan enda ndai.

(3) Sada keriahen adi ipake Tuhan kita jadi alatNa banci nampati/ngkelengi kalak sideban ketimbang kita isampati rusur. Kita nampati mereken pergegeh ntah arah meteri sienggo bereken Dibata man banta, tentu ibas kita ngasup nampati kalak sideben lit sada keriahen (labo kesombongan) perban ipake Tuhan arah kita arah kai silit ibas kita nehken penempat man kalak sideban. Riahen mere asa ngalo, gelah ula min siakap riahen ngalo asa mere. Rikut kuan kuan 19 : 17; nampati kalak musil bali ras pepijamken man Tuhan, Tuhan ka kari siersemulih. Rikutken ayat enda Ibas kita nampati la banci kita rugi,sebab Tuhan siersemulih. Tentu adi Tuhan siersemulih iberekenNa simehulina man banta lebih asa siterukurken kita. Contoh : lit sekalak mahasiswa siudanen, jeneri daramina ingan berlindung paska ibas sada rumah sienggo metua, emaka mis mekuah ate simada rumah ndai perban ia enggo bergehan mis isuruhna kurumah janah tawarkenna mis the manis ras sepotong roti. Meriah kal ukur mahasiswa ndai perban ia pe melehekakal. Kenca lego udan mulih ia pamit man simada rumah ndai. Lebih kurang 10 tahun kenca sie jumpa me mulihi kalah enda ibas sada rumah sakit erkitekiteken simada rumah ndai sakit, kepeken mahasiswa ndai enggo menjadi dokter. Mis ingetna perbahanen orangtua enda ndai jenari tambarina seh ngayak malem. Perjumpan enda labo ise pe nangkasa peban enggo 10 thn, tapi bagem cara Tuhan nehken penampat man banta adi kita nggit ngkelengi ras nampati kalak sideban, alu cara Tuhan nampati lasisangka sangka reh penampat e simehulina kal man banta.

Adi mere kita, ula kita mbandingbandingken ras kalak sideban, contohna : lit kalak mere atena tapi lanai iasurung mere ndai erkiteken ibandingkenna ia ras kalak sideban, bayaken akapna kalak ndai asa ia, sementara sibayak ndai pe lamere. Kita nampati erkiteken enggo sigejap kita itebusi Dibata.

(4) Peran kesah sibadia mpengasup kita guna nehken kekelengen e, sebab nehken kekelengen labo sada dahin simurah. Adi lakin sigejapken uga belinna keleng ate Tuhan e man banta,janah kerina silit ibas kita e rehna ibas Ia, sulit nge siakap nampati. Nterem kalak enggo kristen,tutus gereja, pjj, pa, enggo akapna dung dahinna, tapirikutken 1 kor 13 : 13 kekelengen sipentingna. Mat 5 : 7, ketuahen kalak siperkuah ata ras siper keleng, sebab ia nge ngaloken perkuah ate Dibata.. Mari dage silakoken kata enda man sekitarta, ula nari situnda tunda.

Bogor 15 januari 2013
Pdt.Ediwati Ginting

BP-KLASIS-XXX

"SELAMAT DATANG mengunjungi Web GBKP KLASIS JAKARTA-BANDUNG"

Renungan

  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15

Pengunjung Online

We have 67 guests online

Login Form