Khotbah Matius 28:19-20, Pekan Penatalayanen wari VII, Minggu 26 Januari 2013

Renungan

Introitus :
Man ise pe mehuli Ia, janah keleng ateNa man kerina tinepaNa (Mzm. 145:9)

Ogen : Matius 5:13-16; Khotbah : Matius 28:19-20

Tema :
Kesah Si Badia Mpengasup GBKP Jadi “Sira” ras “Terang” Doni

Ibas berngi si pepituken kita erabahan pekan penatalayanen tahun enda, gereja (pribadi ras organisasi) imotivasi gelah jadi sira ras terang man doni enda. Sada hal si luar biasa kerna kalak Kristen eme Yesus menganalogikenca ras sira bage pe terang. Bagi si eteh sendiri maka sira ras terang iperluken kerina jelma. Emaka ija kalak nggeluh ije lit sira ras terang sebab tanpa sie labo entabeh geluh enda. Tapi si jadi persoalen khususna ibas negeri Indonesia si ngena dingen keleng kel ateta enda, justru Kristen labo ibutuhken, ula padah ibutuhken melasken gelarna pe lang ate kalak segelintir jelma si nggeluh ibas Indonesia enda.

 

Kai nge kira- kira persoalenna ? “Masinsa” kin akapna kerna kehadirenta maka enggo dongkel akapna ? atau memang gelarna ngenca kita sira tapi “la ernanam” man kalak alias enggo hambar. Terangsa kin akapna “terangta” seh enggo mesilau akapna maka lanai ia nggit ndeher ras kita atau memang kita enggo bagi “lampu” si lanai gara piah enggo dongkel akap kalak (enggo akapna makan tempat dingen ndongkeli).

Padahal jelas kel ikataken Yesus “Bagi sira si seh kel perluna bage me kam, bagi terang si seh kel perluna bas gelap bager me kam. Jelas kel ikataken ijenda “fungsi terang ibas gelap”… kuakap bicara man kita melala macamna pe si man pangan e adi rempet mate lampu kuakap lanai bo terterusken man, mis nge cidadap, ijange terterusken man adi kai pe lanai bo idah… tapi memang lit ka nge sebagin jelma mate lampu ka nge akapna meriah, adi gelap kenca mis kin terang ukurna, tapi adi terang je mis tumpat ukurna… kalak si uga nge si bage …. Lit kinlah e atendu…. E kamlah si ngukurisa tapi si pasti kalak si bage lanai bo “jore sa kel e”.

Kata Dibata jadi renungenta senda eme mpersingeti kita kerna statusta eme status si meherga ras ibutuhken kalak, ije lit pesan moralna man banta eme :

  1. Kita meherga emaka mari si ergaken dirinta, memang dari segi financial “sira” labo tinggi ergana, tapi la gia merga iperluken kalak, bas perluken kalake kap nilai erganta. Bagi kuan-kuan singuda-nguda anak perana “mbiring-mbiring kereta api, mbiring gua enterem kalak si nimaisa”.
  2. Kita ibutuhken, pinakit kalak si la nggit terlibas ibas kegiaten-kegiaten persadan eme la akapna ia iperluken. Nina ibas ukurna je ras la je kari aku seri nari nge atena. Emaka la pernah terlibat ibas kegiaten-kegiaten social, nadingi lalap la pernah terlibat ibas kai pe, piah duru lalap, nduru….nduru seh dungna enggo tersuki.

Bagi sira siiperluken gelah pangan banci entabeh, mencegah pembusuken, bage pe adi kalak erkemah biasana isekitar tendana e iamburken sira, gelah binatang-binatang (serangga-serangga) terlebih nipai la pang bengket kubas kemah e “nipe eme lambang iblis si menggoda Hawa gelah man buah batang kayu siilarang Tuhan” bage me harusna fungsi gereja (kalak si enggo tek) jadi teladan kebujuren guna ngelawan kebobroken moral ras “kecurangen-kecurangen” si nyata ibas masyarakat. Gereja si enggo “mbernge” si enggo mpenimpet kuasa Kesah Si Badia si lanai ngelawan kejahaten pasti iutahken Tuhan (Ket.3:16), sira si lanai masin konsekwensi logisna iambekken ras idedeh-dedeh kalak.

Senina ras turang, siipindoken Tuhan man banta eme gelah kita tetap “ersinalsal” ibarat lampu ndai tetap gara. Sebab lampu si gara la mungkin itamaken kalak ku teruh karang, sebab adi lampu si gara itama ku teruh karang nangdangi gurlah (meseng) nge kerina ibahanna. Emaka biasana lampu si gara itamaken kalak ku ingan si meganjang. Tapi lampu si nimpet nge itamaken kalak ku “duru” sebab adi tama tengah jabu enggo ndongkeli, merusak pemandangen, makan tempat, bage me igambarken man “gereja (kalak Kristen) si lanai encidahken “terang Kristus” akan isingkirken (itama ku duru) sebab enggo ndongkeli. Tapi lampu si gara itama ku datas ingan si meganjang, alu kata si deban kalak si terus ngelakoken perbahanen-perbahanen si mehuli terus “itama kalak ku tengah” alu kata si deban pasti “ipeganjangken/iutamaken idarami” Adi kuta-kuta ah mbarenda langa lit listrik masuk desa, lampu patromak enggo hebat si lebih hebat na kerina kalak ndeherisa erkiteken nai megati ka iisuken bas gelap e lit begu, emaka erlumba ku terang kerina, ertina metedeh ate kalak ndeher ras kalak si tetap ngelakoken perbahanen si mehuli.. Labo masalah kel asakai voltasena terang si lit ibas kita si penting “tetap menyala (gara)”, kitik-kitik pe lampunta ibas gelap e adi gara pasti teridah.

Jadi sira ras terang enda me sada strategi “penginjilen” si harus ilakoken kerina kalak Kristen, bahan renungenta bas pekan penatalayanen wari enda si megati pe ijuluki alu Amanat Agung, perintah si mulia si ibereken dingen ipercayaken man kerina kalak Kristen. Perintah e ngataken “laweslah !”. Kata “laweslah” e berarti keke, erdalan “bergerak” nadingken ingan, jadi ijenda kepeken ibas meritaken berita si meriah e “la cukup kita pulung ibas sada ingan je nari ertoto erpuasa, gelah kerina kalak tek man Yesus Kristus. La banci kita menutup diri njaga kebadianta tapi bagi Yesus si enggo nadingken “zona aman” I surga bengket kubas kegeluhen manusia si dem bas perbeben ras meluat. Enda me ikataken solidaritas, terlebihlebih tahun enda gerejanta tuhu erbahan penekanen pelayanen “solidaritas eksternal” emaka gereja harus “lawes” ndarat ibas persadan-persadan kebaktin guna encidahken kebaktin si teridah eme “jadi sira ras terang”, la cukup kita hanya beribadah dingen ertoto saja. La cukup kita ngukurken persadanta saja, sebab kerajan surga e ilitken man kerina manusia si tek man Kristus, si labo terbatas alu suku, warna kulit ras ukuren daging… gedang gendek, mbiring mentar ate Dibata itamaken kerina ku ingan si enggo isikapken-Na.

Laweslah ! tentuna e menuntut sada perdalanen, adi ngerana kita kerna erdalan tentu harus lit ije tujun, perdalanen tanpa tujun e sia-sia, bage pe sebalikna lit pe tujun adi la idalani asa ndigan pe la seh kubas tujun e. Tujun lawes ijenda eme “njadiken kerina bangsa murid Yesus. Jadi murid ertina nggit erlajar man Yesus, jadi labo saja gelah enterem anggota gereja tapi kerina erate-ate, jadi murid maksudna eme sehna sekalak pribadi kubas pertobaten janah kubas keputusen guna nggeluh bagi si ngena ate Tuhan, lanai seri ras doni enda (bdk. Rm.12:2), taat man printah-printah Guru, ngikutken Ia alu tutus dingen setia seh ku Maranatha.

Kalak si tek e harus iperidiken (Markus 16:16), peridin e labo tergantung kubas “pribadi si mpridikenca” emaka labo perlu milih-milihi Pendeta si mpridikenca, sebab pendeta e hanya suruh-suruhen Tuhan. Labo tergantung kubas cara igedapken, icur-curi, isiram, isemprot entah i pir-piri. Si penting iperidiken ibas gelar kai/ise. Tek kita Dibata Bapa, Anak Ras Kesah Si Badia eme gelar Dibata si Telu Sada si najdiken langit ras doni bage pe kerina isina, lalit lebih erkuasa asa sie. Emaka enggo kuh, cukup dingen lengakap adi kita iperidiken ibas telu gelar e, lanaibo perlu itambahi alu peridin-peridin si deban entah peridin kesah,peridin api rasd.

Peridin e eme proses “inisiasi” sekalak jelma kubas rarasen Yesus Kristus. Alu pemahamen si bagenda maka gerejanta ngelakoken peridin “kitik”, sebab ercepatna jelma e bengket kubas rarasen Yesus Kristus e lebih mehuli, janah peridin e la perlu iulih-ulihi, sebab sekali masuk kubas rarasen Kristus enggo cukup. Tapi tentuna la ngadi terjeng iperidiken tapi terus kubas ngajari kalak si enggo iperidiken e gelah ngelakoken kai si enggo iperintahken Yesus Kristus, ertina ajari ia gelah seh paksana ia pe lawes njadiken kerina bangsa jadi Murid Kristus. Ibas Pustaka Sibadia memang lit peristiwa 2 kali kalak pridiken (bdk. Kis. 19:1-5). Erkiteken peridin Yohanes eme peidin pertobaten ibas paksa sie langa iteh kalak pe kerna Kesah Sibadia, janah langa iperidiken ibas gelar Yesus Kristus. Tapi kita enggo iperidiken ibas telu gelar Dibata si Telu Sada, emaka peridinta e enggo sempurna, lanai perlu iperidiken tole.

Tugas ras tanggung jawabata selaku kalak Kristen eme uga gelah kerina kalak si deban “ndalanken kerina si enggo iajarken Yesus man banta, salah sadana eme uga kita sikeleng-kelengen, sebab e me si iperintahken Tuhan. Janah ibas kita ndalanken kai si perintahken Tuhan lit sada janji jaminen si ibereken-Na eme “Aku nemani kam seh ku kedungen zaman”. Janji enda labo bagi janji-janji si ikarang-karang oleh pujangga-pujangga cinta. Tapi si erjanji e eme Dibata si sifatna ya dan amin kekal ras abadi. Janji si mada Kuasa si labo lit kuasa kai pe si banci menggagalkenca. Lang adi mama iting nge si erjanji, bicara tutus kep pe atena erjanji, tepatina ka kel atena janjina e… banci nge la surung sebab banci kai pe ibahan Dibata guna mbatalken janji e…..

Emaka labo man kebiaren jadi sira ras terang, aminna gia sira e harus melengas guna mereken “rasa”, aminna pe gelah jadi terang harus mengorbanken “minyak dan sumbu” adi kita tetap ras Tuhan janah Kuasa Kesah Sibadia si jadi gegehta la pernah kita ngelabuh dingen putus asa, la pernah siakap lit si kurang ibas geluhta. Sebab aminna pe kita slauren berkat la menumpuk) bas kita berkat e tapi si pasti kit ape la kekurangen berkat. Ibarat pancur adi malerlah arah e lau, aminna pe la ngadi ije lau e tapi ia la pernah kerah. Bagi

Tuhan mehuli Ia man ise pe, janah ikelengina kerina tinepa-Na, emaka mari kit ape mehulilah kita man ise pe. Labo lit jelma enda la luluh/lembut ibahan kekelengen. Lit sada keluarga si erjabu, diberuna mejile kel rupana, erpendidiken ras berpenghasilen galang, erjabu ras sekalak dilaki, enggo ka gendek, mibiring ka ia sekalak kurir (si naruh-naruhken barang) ngenca. Engkai akapndu banci ia erjabu ?..... nantikan ceritanya di episode berikutnya

Aminna pe kita minoritas ula atenta ndele, sebab adi sira harus kin sitiken ia asa si man siran, sebab adi kune buen sirana asangken siman siran, e uga pe enggo pagit lanai entabeh. Gelah banci kita jadi sira ras terang itengah masyarakat gereja ras rumah tangganta, salah asada kuncina uga kita tetap geluh ibas Dibata. Nggeluh bas Dibata janah Dibata nggeluh ibas kita tentuna kita harus mbuka pusuh peratenta, lembutkenlah ula pemersik gelah banci bengket Kesah Si Badia kubas pusuhta sebab Kesah Sibadia ngenca “mpengasup” kita jadi sira ras terang sue ras si ikataken Temata wari enda. Bagepe tema umum Pakan Penatalayanenta ibas Tahun enda “Pendahin Kesah Si Badia”, janah guna ngiket kerina Kata Diabata si enggo si begiken sada Minggu enda, si persiapkenlah dirinta guna mengketi Lakon Persadan Si Badia, man ras minem sada meja ras Tuhan. Roti/daging sombol si banci mereken gegeh man banta, anggur/dareh symbol si mereken kegeluhen si mpengasup kita terus berkarya iba geluh enda.

Persiapkanlah hidup kita menjadi roti yang terpecah, persiapkanlah hidup kita seperti anggur yang tercurah, melayani lebih sungguh.

Pertanyaannya adalah :
Maukah kau jadi roti yang terpecah bagi-Ku
Maukakah kau jadi anggur yang tercurah bagi-Ku
Maukah kau jadi saksi membritakan injil-Ku
Melayani mengasihi lebih sungguh ?

Pdt.Saul Ginting

BP-KLASIS-XXX

"SELAMAT DATANG mengunjungi Web GBKP KLASIS JAKARTA-BANDUNG"

Renungan

  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15

Pengunjung Online

We have 60 guests online

Login Form