Suplemen Bimbingen Pjj tanggal 09-15 September 2012, Lukas 12:13-21

Renungan

Bahan : Lukas 12:13-21
Thema : “Jadilah Kam Bayak I Lebe-Lebe Dibata”
Tujun :

  1. Gelah ngawan perpulungen ndarami ras ndalanken kinibayaken Dibata
  2. Gelah ngawan perpulungen ndukung program pelayanen Permata GBKP

Kerina manusia tentu ersura-sura ndatken kebayaken ibas kegeluhen enda. Erbage cara ilakoken, bagepe erbage usaha seh banci lanai pe sieteh kerna waktu guna ndatken kebayaken e. Lit pe ungkapen ibas lagu : “tarum ngayak-ngayak siman tadingenken lupa siman baban”.

Bagem manusia ngayaki kebayaken doni seh maka lupa ka ngayaki kebayaken ilebe-lebe Dibata. Kebayaken ilebe-lebe Dibata eme ndalanken kai siiperentahkenNa, termasuk ngelola pemereNa arah kinilitenta guna banci ermulia Tuhan Dibatanta. Ertina Kai silit ibas kita (erta/kebayakenta) labo enda jadi milikta saja entahpe guna kesenangenta saja tapi pe lit bagin kalak sideban. Sie mabai kita nggeluh jadi “berkat” / Pasu-pasu man kalak sideban.

Bagem ibas rangka 64 tahun Permata GBKP (12 September 1948) ibabai ka kita guna mperdiateken keberadaan anak singuda (Permata). Keberadaan Permata ibas jaan gundari tentu banci radu ras siidah ibas erbage-bage persoalen masa ngudana, subuk studina, pendahinna, teman geluhna, bagepe kerna pergaulenna termasuk tantangen masa ngudana ibas kegeluhen masyarakat modern gundari. Selaku orang tua tentu ibabai kita megermet ras metenget kerna perkembangenna segelah banci permatanta pe jadi simeherga ibas kegeluhen enda termasuk man Tuhan Dibata. Sienda banci sicidahken alu kita la saja ngukurken banta, mpekena dirinta saja tapi pe mediate nandangi sekelewetta khususna Permatanta.

Erpalasken bahan PJJ enda banci siidah :
(1) Peran Tuhan Yesus : Icidahken Yesus kerna diriNa labo selaku hakim bagi pengakap manusia, tapi hakim ibas kinirajanNa. Pengajaren Yesus ibas nulak pemindon kalak si mindo gelah ibagi kenna erta-erta orang tua, nuduhken maka Yesus hadir guna mpersadaken kerinana termasuk maba perdamen bagepe maba keadilen rikut ras maba kekelengen sada ras sidebanna. Sienda icidahken Yesus ibas pengidahna kerna penungkunen e terjeng memenangken sepihaksaja kerna erta tading-tadingen. Pengidah Yesus eme segelah ula min kita nggeluh ibas kerangapen erta seh maka gelap pengidahta kerna kegeluhen termasuk keluarga/perkade-kaden.
(2) Perumpamaan Kalak Bayak Si Lenge. Perumpamaan enda nuduhken kerna keberadaan manusia si terjeng :

  1. Ngukuri bana saja
  2. Bangga kerna kebeluhen/kinilitenna
  3. Bersyukur ibas erti memegahken diri
  4. Mesuri bana saja

Perukuren sibagenda icidahken Yesus ibas kecenderungen manusia si terjeng ngidah rencana/rancangenna, mengandalken dirina saja jenari la mediate/kepate nandangi kalak sideban. Kecenderungen jelma sibage eme individualistik si pesenangken dirina jine. Adi gambaren sibagenda tentu lanai bo ingetna Dibata simada kerinana termasuk kinilitenna, seh maka akapna lit denga lalap rencana sipayo tapi lanai ingetna maka keputusen kai pe e ibas Dibata nari.
Adi keputusen e nina Dibata maka ia arus Mate.... tentu jadi me ia kalak si “bodoh” sebab lanai lit gunana kai pe si lit ibas ia. Kebayaken kalak sibage kentisik ngenca jenari lesap la erbekas. Pengajaren Yesus arah perumpamaan enda eme segelah manusia bayak ilebe-lebe Dibata si teridah alu :

1. Nggeluh mediate nandangi kalak sideban,
2. Nampati kalak sideban,
3. Nggejapken kesusahen kalak sideban
4. Nehken kekelengen
5. Nggit berbagi
6. Nggit berkorban

Arah bahan enda ibabai kita nggeluh ibas kepentaren Dibata eme nggeluh ibas kebayakenNa. Ula min kita jadi kalak si “bodoh” siterjeng ngukuri dirinta saja, jadilah kita manusia si “erguna” ibas kegeluhen enda.

Keberadaan Permatanta jadi min perhatinta selaku bentuk mediate alu kininggitenta berbagi: pengalamen, pengajaren, kepentaren seh maka ernanam ka akap permatanta ibas kegeluhenna kerna keberadanta. Ancamen masa muda Permata labo terjeng ancamen Permata saja, tapi jadi “ancamen” man kegeluhen termasuk masa depan : keluarga, gereja, bangsa ras negara. Tentu kita pe iajuk guna “berbagi” (shering) seh maka jadi ernanam keberadanta sada ras sidebanna.

 

 "SELAMAT DATANG mengunjungi Web GBKP KLASIS JAKARTA-BANDUNG"

Renungan

  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15

Pengunjung Online

We have 50 guests online

Login Form