Khotbah Matius 7:1-20, Pekan Keluarga Wari VI (Jumat, 8 Juni 2012)

Renungan

Introitus :
Bahanlah man kalak si deban bagi ngena atendu ibahanna man bandu (Matius 7:12 a)

Ogen : Kejadin 33:6-11; Khotbah : Matius 7:1-20

Tema :
“Persadan Jabu Ibas Keluarga Kristen”

Pokok Pikiren:

1. Gelah jabu kalak Kristen meteh kerna erti persadan ibas jabu keluarga Kristen.
2. Gelah jabu kalak Kristen ngasup guna ncidahken persadan e ibas kegeluhen si tep-tep wari (bdk.khotbah).
3. Ndalanken persadan ibas jabu jumpa kemalemen ate.

Perlebe

Keluarga eme “persadan totalitas kegeluhen” antara sekalak dilaki ras sekalak diberu erpalasken perbilawanenna arah kesepakaten perjabun. Pesadan enda iperluas alu kehadiren anak-anak itengah-tengah jabu. Tanda khusus persadan jabu kalak kristen eme nggeluh erpalasken kiniteken, kekelengen ras kesedian saling mengembangken pribadi sada ras sidebanna. Menurut kalak Katolik erpalasken Konsili Vatikan II, keluarga eme “Gereja rumah Tangga”. Arah istilah enda ngataken maka jabu eme pusat sada kiniteken si enggeluh ras erbahansa kiniteken e tetap megegeh. Emaka ibas rumah tanga/jabu kalak kristen arusna lit persadan bagi persadan Dibata Bapa ras AnakNa Yesus Kristus (Bd.1 Yohane 1:3b). Persadan e eme persadan ersada ibas pikiren, perasan ras sura-sura. Anak-anak la saja la mberontak man orang tua, tapi ibas ia pe lit pikiren, perasan ras sura-sura si seri ras orang tuana. Bagepe ndehara labo erkiteken nggit talu gelah banci patuh man perbulangenna, tapi erkiteken lit sura-sura si seri ras perbulangen, bagepe perbulangen labo erkiteken terpaksa engkelengi ndehara, tapi sura-sura siseri ras ndeharana. Persadan si bagenda memang labo nukah, tapi banci ilakoken adi masing-masing komponen ibas jabu e bagi nina Paulus ibas Filipi 2:2b “Ersada min arihndu, sikeleng-kelengen min kam, ersada min geluhndu dingen ersada ukurndu”. Bagepe Filipi 2:5 “Perukurenndu bali min ras perukuren Kristus Jesus”. Adi bage me persadan ibas jabu, enggo pasti jabu e tetap megegeh ras jumpa kemalemen ate. Tentu gelah banci jadi jabu si harmonis eme persadan jabu si megegeh, perlu proses ras perjuangen siterus-menerus. Emaka arah pekan keluarga tahun 2012 enda, khususna arah kata Dibata siniorati kita wari si peenemken enda erbahansa jabunta kerina tetap paguh kiniersadanna selaku jabu kalak kristen itengah-tengah doni enda.

Pebagesi pengankan kerna Nast

Kata Dibata siman oratenta ibas Pekan Keluarga berngi si pe 6 ken enda tetap denga bagin khotbah Yesus i datas Uruk, Matius 7:1-20. Lit empat thema entah judul ibas bagin enda si jadi pengajaren Yesus. Sipemena eme kerna Ngadili; sipeduaken kerna Mindo, Ndarami, dingen Nuktuk; Sipeteluken kerna Pintun Sikitik; ras sipempatken kerna Batang ras Buahna. Masing-masing bagin enda mereken pengajaren ras persinget uga kin arusna kalak sitek nggeluh ntah pe ersikap baik ibas interaksi ras sesama bagepe ras Dibata.

Sipemena, kerna Ngadili (ayat 1-6). Salah sada sikap nggeluh kalak sitek si isingetken ijenda eme “ula saling menghakimi”. Yesus la senang nandangi kalak si nalahi kalak sideban alu la adil. Maksudna lit ije unsur pekulah-kulah ntah pe fitnah, maka alu nalahken kalak sideban tempa ia sibersihna, sibenarna ntah pe la bagi kalak sinisalahina e (ayat 3). Nina Yesus, ise sinalahi (menghakimi) kalak sideban alu cara bage, bagi penalahkenna e ka ia isalahi Dibata (Yakobus 4:12). Arah kata enda labo maksud Yesus, adi lit kalak erbahan jahat ntah nggeluh lanai ibas dalan Tuhan, la nai perlu ipandang, inasehati, labo bage. Sabab kalak kristen pe perlu ngadili dirina ras anggota perpulungen si jadi batu antuken (Bd.1 Korinti 5:3-5, 12, 13). Bagepe adi sibaca ibas Yehezkiel 3:18-19 maka adi la sipersingeti kalak si erbahan jahat kita pe ikut nanggung dosana. Jadi kuakap ibas enda siperlu iperhatiken eme motivasina.

Sipeduaken, kerna Mindo, Ndarami dingen Nuktuk (ayat 7-12). Ibas bagin enda lit dua hal si isehken eme: (1) Yesus njemba kalak sitek gelah tutus (bertekun) ertoto. Adi siperdiateken ayat 8 berarti ertoto la erngadi-ngadi (terus-menerus). Kita harus terus nindo, ndarami ras nuktuk. Kata Mindo berarti lit kesadaren kebutuhen ras kiniteken maka Dibata megiken pertotonta. Kata Ndarami nuduhken maka kita mindo alu tutus janah ncidahken kepatuhen nandangi sura-sura Dibata. Pengertin kata Nuktuk nuduhken lit ketekunen ibas reh ndahi Dibata anem gia Dibata la mis njabab pertotonta. (2) Jaminen maka kalak si mindo ibereken ntah pe ngalo eme erpalasken: sifat Dibata e sendiri ija keleng ateNa e melebihi keleng ate sekalak bapa ibas doni enda nandangi anakna (ayat 9-10). Amin gia bage tentu lit ngenda arus silakoken maka kita ngalo, eme:

  1. Ndarami lebe Kinirajan Dibata (Matius 6:33).
  2. Tek nandangi kiniulin ras keleng ate Dibata selaku Bapa (ayat 11, Yohanes 15:16; 16:23,26; Kolose 1:9-12).
  3. Ertoto sue ras sura-sura Dibata (Mr 11:24; Yoh 21:22; 1Yoh 5:14);
  4. Ngasuhi persadan ras Kristus (Yoh 15:7);
  5. Ngikuti/Patuh nandangi perintah Kristus (1Yoh 3:22), salah sada perentahNa, bahken ikataken kesimpulen Undang-undang si nisuratken Musa eme “Bahanlah man kalak si deban bagi ngena atendu ibahanna man bandu” (ayat 12). Madin erbahan man kalak si deban bagi ngena ateta ibahanna man banta asangken saling menghakimi.

Sipeteluken eme kerna Pintun Sikitik (ayat 13-14). Bagin enda nuriken lit dua pintun sibertolak belakang si la banci lang arus sipilih salah sadana. La banci netral. Janah pintun siipilih menentuken masa depan manusia. Emaka gelah ula salah pilih isingetken ibas ayat 13-14. Nina Yesus bengketlah arah pintun si kitik, anem gia mesera erkiteken dem tantangen ras kiniseran, tapi dalan e labo akhir segalanya sabab ujungna lit keselamaten/kegeluhen sirasa lalap. Sebalikna dalan si mbelang e ujungna eme neraka. Pengajaren enda tentu erbahansa sengget kalak Yahudi, sabab lit pemahamen ibas ia erkiteken ia keturunen Abraham, ia pasti selamat (bd.Matius 3:9-10). Bagepe tentu man kalak si memahami mbue dalan ku surga (pluralisme). Ibas pengajaren enda isingetken maka dalan sinuju ku kegeluhen si rasa lalap eme pintun sikitik (Yesus Kristus: Bd.Yohanes 14:6).

Sipeempatken, kerna Batang ras Buah. Bagin enda situhuna mpersingeti kalak sitek gelah metenget nandangi nabi-nabi palsu/perguak. Memang labo nukah mbedaken apai nabi situhu-tuhu ras apai si lang. Amin gia bage labo berarti la terbedaken. Ibas waktu kentisik banci saja lenga terbedaken, tapi ibas waktu sigedang pasti terbedaken nge. Bagi nina Yesus, arah buahna sitandai nge batangna. Tentu la saja guru-guru palsu ntah nabi palsu, tapi pe apai kalak kristen si tuhu-tuhu ras apai silang arah sikap geluhna tereteh nge, labo terbuniken. Teridah nge persadan jabu e megegeh ntah lang arah kegeluhen sitep-tep wari, terlebih arah kegeluhen anak-anak.

Pointer Aplikasi

(1) Ngerana kerna persadan jabu ibas kalak kristen, maka banci meteguh persadan e la banci lang ibas komponen isi jabu e (Bapa, nande, ras anak-anak) lit hubungen simehuli ras Kristus, desken batang kayu ras dahan-dahanna (adi dahan-dahan e labo ersada ras batang la banci lang kerah me ia: bd.Yohanes 15:1-8), siteridah arah sikap nggeluh:

  1. la sisalah-salahen (Tidak saling neghakimi),
  2. Ertoto secara kontinyu ras teratur (la erngadi-ngadi), baik secara pribadi bagepe secara keluarga,
  3. Erdalin ibas dalan Tuhan (pintun si kitik). Alu kata sideban nggeluh ibas prinsip kebenaren Kata Dibata, janah sienda labo nukah emaka banci saja erbage-bage kiniseran nderpa kegeluhenta, tapi la e erbanhansa kita mbiar; la aru ateta sabab siteh alu pasti maka erdalin arah pintun si kitik e ujungna eme kegeluhen si rasa-lalap,
  4. Jadi berkat (erbuah mehuli). Jabu kalak kristen, jabu sipalasna tek man Yesus Kristus arusna jabu si jadi teladan, jabu sinaksiken kegeluhen simehuli. Desken batang kayu simehuli tentu mehuli nge ka buahna. Bagem arusna jabu kalak kristen, goal-na eme jabu si harmonis ija bapa ras nande sada ukur, sada arih, sada penggejapen, terlebih sada visi nandangi erti kegeluhen jabu, bagepe nandangi anak-anak ras masa depanna. Enda jadi penting ras relevan ngidah uga kinata jabu-jabu jaman genduari. Mbue jabu simulihen, anak-anak terjangkit pinakit sosial: judi, menem-menemen keras, ngelakoken kejahaten, seks bebas, narkoban, rsd.

(2) Emaka arah kata Dibata ibas pekan keluarga wari si pe enemken enda, mari siperiksa mulihi jabunta sekalak-sekalak. Enggo me jabunta jadi jabu si harmonis ntah pe jabu si enteguh persadanna? Kai pe jababna mari sinilai arah penungkunen enda. Sipemena, enggo me lanai saling menyalahken/menghakimi ibas jabu? Sipeduaken, lit nge kegeluhen si ertoto ibas jabu secara kontinyu (terus-menerus) ras tek maka Dibata megiken ras nehken pemindonta? Sipeteluken, enggo me nggeluh erpalasken prinsip kebenaren kata Dibata? Sipempatken, enggo me jabunta jadi pasu-pasu man jabu kalak sideban, eme arah kegeluhenta siberubah ras erbuah?

Pdt.S.Brahmana

BP-KLASIS-XXX

"SELAMAT DATANG mengunjungi Web GBKP KLASIS JAKARTA-BANDUNG"

Renungan

  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15

Pengunjung Online

We have 53 guests online

Login Form