Khotbah Perbahanen Rasul 17:22-28, Pekan Penatalayanen, Kamis 20 Januari 2011 (Wari V)

Renungan

Introitus :
Tedis Paulus i lebe-lebe sidang Areopagus jenari nina, "O kalak Aten! Enggo kuidah maka kam kalak tutus tuhu-tuhu i bas agama (Perbahanen Rasul 17:22)
Ogen: Galatia 3:23-25; Khotbah: Perbahanen Rasul 17:22-28
Thema : Niksiki Konsep Budaya Karo Ibas Mbangun Ibadah GBKP

Kata Perlebe

Injil memang berbeda ras kebudayaan, tapi injil la banci ipisahken ras kebudayaan. Kristen erne budaya ras kebiasaan sir eh ibas pengajaren Tuhan Yesus, Injil harus idatas kerina kebudayaan gelah kerina budaya erdalan sue ras Kata Dibata. Jadi ibas konteks menginjili ibas budaya, harus sieteh uga carana maka injil e masuk kubas kebudayaan alu la erbahan pertentangen ras budaya e, ndarami persamaan ibas si mehuli ras mengubah si la mehuli sue ras Kata Dibata sitik demi sitik.
Perlu ibahan sada konsep Kontekstualisasi sebagai sada strategi penginjilen ija nilai kebudayaan e perlu tetap iakui maka, ertina perlu ihindari sikap konfrontasi antara injil ras kebudayaan.

Penekanen pelayanen ibas tahun enda eme peningkaten spiritualitas ras mutu ibadah. Tentuna selaku kalak karo pe mbue praktek-praktek "penyembahen" siilakoken orang tuanta ndube ibas zaman siadi si ianggap mehuli, perlu si kaji (gargari) gelah peribadahen ibas GBKP enda semakin encidahken nuansa Karo tapi isina/muatenna eme Kata Dibata. Guna sie mari erlajar kita bagi kai siibahan Paulus i Atena.

Pendalamen Teks

Kalak Aten tuhu-tuhu taat kel ibas peribadahen, sie teridah aragh buena patung ingan sembah-sembahen man kerina dewa-dewa. Petronius ngataken : "Di Atena ornag lebih mudah menemukan suatu ilah (dewa) daripada seorang manusia. Pausianis mengabarkan bahwa di kota Atena saja terdapat patung-patung yang melebihi jumlah seluruh tanah Yunani, rupa-rupanya sudah 1000 tahun sebelum Kristus Athena sudah menjadi kota yang termasyhur.[1] Kalak Aten ersura-sura gelah nembah kerina Dewa-dewa, sebab ipahami kerina dewa e banci mbaba pasu-pasu adi ipajuh tapi sebalikna mereken palu-palu adi iabaiken, erdandanken sie mbiar ia lit dewa si la ipajuh emaka ibahanna persembahen man dewa "lain-lain" (dibata si lai itandai).

Ngidah bage buena patung-patung e, nembeh kel ate Paulus (ay. 16) erdandanken sie ngeranai ia ras kalak Yahudi bage pe ras kalak si deban si ikut nembah ibas rumah pertoton (17). Paulus ituduh bagi kalak tukang koyok si labo lit pemetehna. Sebab ia ngajarken dua dibata si asing, sebab ituriken Paulus kerna kekeken.
Paulus itangkap ras ibaba kubas sidang "Areopagus" sebab enterem kalak si merincuh megiken pengajaren si mabru enda (ay.20-21). Areopagus eme sada uruk si kitik si ithabisken guna dewa perang Ares (Mars) deher lapangen pasar Agora I sebelah barat Akropolis. Uruk si kitik enda ndai sebagin enggo iperata janah lit dingdingna arah pudi piga-piga meter ganjangna . Sada ingan si mejile kel ingan ngerana banci terbegi ijanari pe. Emaka banci sibayangken sanga uga bergemana sora Paulus nuriken injil man kerina jelma si hadir ibas paksa sie.
Ije me ituriken Paulus, uga pertutus ate kalak Atena erdibata, Paulus meenaken "kesaksinna (khotbahna) alu kai si enggo biasa ilakoken kalak Aten, emaka tuhu-ruhu kel menarik perhatin kerina jelma. Lit sada dongeng si nuriken maka I Athena pernah terjadi wabah "pes", la ieteh kalak ras ilah siapai ia harus iperdamaiken gelah wabah e banci ngadi. Pujangga Epimenindes I kreta nari maba domba mentar ras mbiring ku Areopagus alu pendahin ija kari domba e medem ije me ipajekxen mesbah, ije me ibahan dewa si la ergelar,sada Tuhan si perbahanena itandai tapi gelarna la ieteh, janah gundari em dalan Paulus guna memasukken pengajaren man kerina kalak Atena, Dibata si la itandaindu e me ku petandaken man bandu. Seterusna Paulus nuriken ise kin Dibata si enggo njadiken Langit ras doni,I albo tading ibas sembah-sembahen.


Pointer Aplikasi

1) Merubah sada kebiasaan alu total tentu sada pendahin si mesera kel, bahken banci terjadi pertentangen (perang) la teraloken kalak kehadirenta, emaka perlu kita erbahan penyesuaian, gelah banci kita bengket, bagi si kataken Paulus : Nandangi kalak si merampek kinitekenna, bagi ia e ka aku, gelah kudat ia. Aku enggo jadi bali ras kerina kalak rikutken paksana gelah banci deba-deba ia kuselamatken alu kerina dalan si payo.[2]
2) "Enda jadi bahan diskusinta" Theologia Kontekstualisasi erne sada usaha uga maka injil e banci teraloken sue ras konteks (situasi) kebudayaan setempat, emaka banci ka nge si daramai peraktek-peraktek kiniteken si ndekah ibas kalak karo tapi iterangken janah igantiken "substansina" misalna ibas kalak karo lit upacara "persilihi" ngantiken kalak si birawanen alu batang galuh, situhuna pengajaren Kristen pe lit nge pengajaren sib age misalna "Yesus me kahulta (banci jadi kebaktin Jumat Si mbelin enggo rusursa sibahan kebaktin alu jalan salib, tapi guna mnyegarken ibadahta entah banci ka nge si bahan semacarn upacara persilihi, tapi kita labo igantiken alu batang galih tapi igantiken Yesus Kristus)". Maba anak ku lau tentu banci ka nge e si sesuaiken ras maba anak guna iperidiken (bdk. tulisen ibas bimbingenta). Releng tendi e banci kang sibahan semacam upacara guna "ndilo Kesah Sibadia" mengketi kegeluhenta guna meningkatken spiritualitasta. Gundari mesur-mesuri (nujuh bulanen) enggo megati ibahan kebaktinna, entah perlu ka "bagi kalak ngengget" man kalak si langga ndat tuah ibahan acarana encidahken ketutusen ate ertoto mindo man Tuhan.


Kelender, 10 Janauari 2011
Pdt.Saul Ginting, S.Th
----------------------------------
[1] Tafsiran Alkitab Kisah Para Rasul, BPK, GM, Jakarta 1996, hal 278
[2] 1 Korintus 9:22

BP-KLASIS-XXX

"SELAMAT DATANG mengunjungi Web GBKP KLASIS JAKARTA-BANDUNG"

Renungan

  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15

Pengunjung Online

We have 137 guests online

Login Form